Prentsa oharrak
LABORAL Kutxak berritu egin du CEPESekin duen konpromisoa gizarte-ekonomiako enpresak sortzen eta sendotzen laguntzeko
Hitzarmenak 3 urteko iraupena izango du, eta gaur sinatu dute CEPESeko lehendakariak, Juan Antonio Pedreñok, eta LABORAL Kutxako Negozioaren Garapen Areako zuzendariak, Ibon Urgoitik
2020ko abenduaren 4a.–LABORAL Kutxak berritu egin du Ekonomia Sozialeko Espainiako Enpresen Konfederaziorekin (CEPES) gizarte-ekonomiako enpresak sortzen eta sendotzen laguntzeko konpromisoa, bi erakundek gaur sinatu duten hitzarmenaren bidez. LABORAL Kutxako Negozioaren Garapen Areako zuzendariak, Ibon Urgoitik, eta CEPESeko lehendakariak, Juan Antonio Pedreñok, sinatu dute hitzarmena.
LABORAL kutxa eta CEPES elkarlanean ari dira 2016az geroztik hainbat ekimenen bidez; alde batetik, gizarte-ekonomiako enpresen finantzaketa errazteko, eta, bestetik, haien hazkundea eta sustapena bultzatzeko, CEPESek Europako Gizarte Funtsaren bitarteko erakunde gisa ematen duen laguntza teknikoaren zati bat finantzatuz.
Hitzarmenak hiru urteko iraupena izango du (2020-2023), eta Espainiako gizarte-ekonomiako 43.000 enpresa baino gehiago baliatu ahal izango dira horretaz. Era berean, CEPESen onuradun diren erakundeak ere baliatu ahal izango dira hitzarmenaz, Gizarteratzeko eta Gizarte Ekonomiako Programa Operatiboaren (POISES) esparruan, Europako Gizarte Funtsaren (EGF) bitarteko erakundea baita CEPES.
Joan den irailean 2020-2023 aldirako egindako azken laguntza-deialdian jaso zituen eskabideen ebaluazio-prozesua egiten ari da CEPES gaur egun. Guztira 19,2 milioi euroko dirulaguntzak banatuko ditu. Zehazki, bi deialdi izan dira. Lehenengoaren bidez 12,3 milioi euro banatuko dira, gizarte-ekonomiako enpresen kopurua handitzeko, ekintzailetza kolektiboa sustatzeko, enpresen lehiakortasuna hobetzeko eta COVID-19ak eragindako krisiaren eragina arintzeko. Bigarren deialdiaren bidez 6,9 milioi euro banatuko dira, desgaitasuna duten edo gizarte-bazterketako arriskuan dauden pertsonak gizarteratzen lan egiten duten gizarte-ekonomiako erakundeen kopurua handitzeko, haien lehiakortasuna eta egiturak hobetzeko eta COVID-19ak eragindako krisiaren eragina arintzeko.
Bi erakundeok gizarte-ekonomiako erizpideak eta baloreak partekatzen dituzte eta enplegua sortzeko helburuan ikuspegi bera dute ere. Hori dela eta, lankidetzan jarduten dute gizarte-ekonomia bultzatzeko, etorkizun hobea lortzeko bide egokia delakoan.
LABORAL Kutxak gizarte-ekonomiarekin eta, zehazki, CEPESekin duen konpromisoa azpimarratu du Pedreñok. Izan ere, «finantza-sostenguak berebiziko garrantzia du gaur egun, enpresei laguntzeko eta COVID-19aren eragina arintzeko. Beste alde batetik, LABORAL Kutxak elkarrekin gestionatzen dugun programa operatiboarekin duen konpromisoa ere guztiz garrantzitsua da, haren bidez gizarte-ekonomiako enpresak sortzen eta sendotzen laguntzen baitu».
Kreditu-kooperatibak gizarte-esparrua bultzatzeko duen engaiamendua nabarmendu du, bere aldetik, Ibon Urgoitik: «Finantzaketa-lerro berri horrekin, bestelako banka baten aldeko apustua berresten dugu berriro, gizarte bidezkoagoa eta kohesionatuagoa ahalbidetzen duten enpresei laguntzen dien bankaren aldekoa», esan du.
CEPESi buruz
Espainiako gizarte-ekonomia ordezkatzen duen erakunde nagusia da CEPES. Hala, botere publikoekin elkarrizketa instituzionala bideratzeko plataforma da. Guztira 28 bazkide ditu, 43.192 enpresaren interesak ordezkatzen dituztenak. Enpresa horiek, berriz, Espainiako enpleguaren % 12,5 eta BPGd-aren % 10eko fakturazioa osatzen dute. Bazkide horiek erakunde nazionalak edo autonomikoak eta enpresa-taldeak dira, 200 egitura autonomiko baino gehiago dituzte, eta honako enpresa eta erakunde hauek ordezkatzen dituzte: kooperatibak, lan-sozietateak, mutualitateak, gizarteratze-enpresak, enplegu-zentro bereziak, desgaitasunaren sektoreko elkarteak eta arrantzale-kofradiak.
LABORAL Kutxari buruz
MONDRAGON KORPORAZIOko kreditu-kooperatiba da LABORAL Kutxa. Bere finantza-jardueraren bidez, 1.100.000 enpresari eta familiari baino gehiagori ematen dizkie produktuak eta zerbitzuak. Bere bulego-sareak 300 salmenta-puntu baino gehiago ditu Estatuaren ipar-erdialdeko biztanlegune nagusietan.
Entitatearen enpresa-ereduaren oinarriak soldata-elkartasuna eta langileek gestioan parte hartzea dira; izan ere, entitatearen jabeak langileak berak dira. Entitatearen balantze orekatua erakusten dute 2019ko itxierako datuek. Hala, 23.590 milioi euroren baliabideak gestionatzen ditu eta 13.826 milioi euroren kreditu-inbertsioa du. Azpimarratzekoak dira kaudimen-maila handia —% 20,17ko Core Capital (Tier1)— eta zerga ondorengo irabazi bateratu garbia: 137,7 milioi euro.
Informazio gehiago hemen: www.laboralkutxa.eus.